原來收到 surprise o既感覺係咁正o架！哈哈~ 不過我只相信自己係太戇直同埋真誠o即~ 並唔係雞翼 Wing 所講o既”唔聰慧o既腦袋”，唉~ 我諗呢個世界上都無乜邊個人會相信我呢句說話o架喇~! 究竟發生緊咩事？我都係今日夜晚六點十幾分先知o架jar~ 不過知道得太突然…係一個因為自己”蠢”，而製造俾自己o既最大驚喜！但係如果自己唔夠”蠢”，又無可能會咁開心o架喎…所以話呢，阿蠢未阿蠢囉~！有咩問題喎？我開心，大家都開心，咁就得喇。
等我o係解釋之前，整理一下之前o既所有線索先…
‧阿飯返o左o黎之後， Waiting 又走o左過去佢間房同佢密針喎…針左都有一段時間。… … 其實我都覺得有o的怪怪地o架喇，乜咁神秘咁多o野要講o既？不過又諗到可能係o的女仔o野、或者 toilet-mate、又或者係因為熟朋友關係有o野要私底下講喇，咁我就覺得廢事去作無謂o既猜度喇，咁樣估o黎估去好唔道德o即？所以我就掂下 Waiting 部電腦等佢講完番過o黎咁囉。
‧尋晚我無預先打電話俾 Waiting 就去搵佢，佢話要傾電話之後就神神秘秘咁過o左隔離房傾電話喎。 … … 咁我估女仔多電話傾係正常o既，而且內容如果唔關我事，我知o黎做乜喎？如果係關我事o既話，佢會同我講o既，我唔想好似 check 住 check 住咁嘛，所以雖然我當時幾好奇，但係就覺得無謂八卦喇，未繼續做自己o野囉。
‧因為今日我同 Waiting 約定o左今日會出街o架嘛，所以 Waiting 前一日就問有咩地方想去喇，我話唔好去行街喇。【因為 Waiting 呢幾日行得街多，買得多o野，唔想再行商場洗錢喇】咁佢話：「唔係呀，聽日行o下商場喇，因為要買o野俾 BB 【佢個姪女】做聖誕同生日禮物呀」咁 OK 喇，咁我未話不如去尖沙嘴或者銅鑼灣喇，o個度多o的o野賣嘛。但係佢就話，唔好喇，去旺角喇，旺角近之類o既野，所以就決定去行旺角喇。
咁之後就同 Waiting 一齊出街食午飯喇，佢問我去邊度食o野好喎？我就諗緊，都成三點幾喇，無理由留o係 hall can 嘛？提o左幾個地方同埋經過一番討論之後【或者係被引領之下，去o左太子食午飯。】不過食午飯時都已經成三點三喇，而且因為太凍，我想食粥、粉之類o既o野喇，可以暖身嘛，但係心目中只有味千拉麵同埋海皇粥店呢兩間鋪頭…因為我食開有感情，又少出街，我食o黎食去都係o個幾間o架jar…所以我當堂啞o左，點算好呢？我都無心水o既食店喎…跟住 Waiting 就介紹喇，佢話不如去太子食o個個吉列豬排蕃茄米線喇。雖然係幾熱氣【呢排突然間凍左咁多，如果仲食咁多煎煎炸炸o野，好易就病o架喇，我地都唔可以病囉】，不過真係無介紹錯bor，又好食又大碗又別緻又唔貴喎，呢個 Good 呀！不過最弊呢度係太子，唔係海港城 Starbuck 呀~ 無得坐o係窗邊望人狼狽樣之餘，仲要俾人當係金魚缸咁望番轉頭添，哈哈哈~
食完之後， Waiting 話要幫佢阿姨搵幾間鋪頭今晚七點打邊爐喎。我當時就諗：「o下？乜咁得意既？阿姨要同班 fd 打邊爐，佢要幫手搵地方仲要 book 埋檯俾佢咁抵得諗？無咁熟呀嘛？不過都無問題既，可能真係好熟掛，而且 Waiting 幫得就幫都係好事o黎o既，咁我可以對住 Waiting ，基本上去邊做咩都無問題o架喇。」我真係一o的猜疑都無囉，咁就陪佢去o左幾間火鍋鋪頭問價同埋留名喇，留名o個陣時其實都有o野想問o架喇，點解留電話會留 Waiting o個個，唔係留佢阿姨o既？仲有呀，搵鋪頭搵得三四間咁少就夠喇？之後通知佢阿姨時，又咁神秘要我行開少少先傾喎…(？.？ )
好喇，留o左位之後就走去買禮物，去o左潮流特區、新之城咁，佢問我買咩好喎，咁我話：「唔好買公仔喇，咁細個公仔可能會嚇親佢o架，不如買帽、衫、幭咁喇。」佢又無應我喎，跟住睇睇o下就去o左睇佢想買o既 MP3 頸繩喇。「o下？乜唔係要買禮物o既咩？又睇o左頸繩o既…唔係呀嘛!?」而家諗番…係未想拖延時間呀…？
[##_1L|037130.gif|width=230|去左呢間酒家打邊爐呀~ _##]之後六點半左右就去返始創中心樓下等喇，因為驚無位留到俾佢阿姨嘛，我未”吹”佢話不如早o的上去等o下位好過喇，今日會好多人o架喎，仲要約七點添，有排等，但係就見到 Waiting 好苦惱咁o既樣喎。有咩事呢？ Book 檯等位o即？好似咁多o野諗咁o既？唔係凍親攪到病呀嘛？又可能係太”支力”，都唔知點幫到佢添，未不停o係佢隔離俾o下意見咁囉。到七點正，有位坐喇，我就問個經理可唔可以早少少俾我o地入去喇，因為見愈o黎愈多人，位就愈o黎愈少，而 Waiting 又好似好 tired 咁喇，咁我就幫佢 “jar” 下主意咁喇，希望佢唔駛諗得咁辛苦。睇到佢個樣就心痛喇，諗到佢嘴到o都長埋，仲皺埋眉頭添，有咩事咁煩惱呀。就算”手羅”唔到檯都無辦法o架喇，唔係你o既錯o黎o架嘛，唔得未走去食必勝客囉，傾計聚舊o即，都 OK 喇。
一行到埋張檯度， Waiting 就坐個最入o既位喇，我就即刻問：「o下？坐咁入o既？咁你阿姨o黎到o個時走番出o黎未好難走囉？都係坐出面喇。」佢同我講話：「等o左咁耐，緊係食住先喇！」我驚訝：「o下…？會唔會唔係幾好意思呀？你阿姨同班 fd 聚會喎，我o地兩個o係度食住等？好似好肉酸咁喎，點好意思呀？你同你阿姨好熟o既咩？但係佢班 fd 無理由唔介意呀嘛？」佢終於都忍唔住喇…
「唉…阿程你有無咁蠢呀？咁都仲未估到呀？係呀，我同阿姨班 fd 好熟o架，佢班 fd 未即係你班 fd 囉，我o地諗住同你慶祝生日呀，你有咩可能到而家都唔知道o架？本來諗住佢o地成班人一齊o黎到就俾個驚喜你o既，點知你坐低好似好內咎咁，食都食得唔安樂喎，攪到我唔講唔得。」
o個一下真係好激動o架，好 surprise 、好開心、好感動。好多謝你o地囉， Waiting 、秀嗡、阿森、阿行、雞翼 Wing 同差o個爆o左大鑊俾我知o既阿飯。諗得咁辛苦就係為o左我o既生日呢一o野真係心都酸埋，幾激動o下！真係好感激你o地o既心意囉。
食完o野之後，我o地就去o左新世紀旺角嘉禾睇戲[##_1R|018920.jpg|width=200|睇功夫 _##]喇，原本想睇歌聲魅影o架，不過就無咩位剩，所以就選擇o左睇功夫，o係佢o地盛讚o既時候，我就覺得麻麻地喇。因為呢套戲太過血腥核突喇、又太暴力粗口咁，而且攪到 Waiting 有o的唔開心添，因為佢唔鐘意呢類片o架，有o的位會嚇親佢囉，佢仲覺得唔應該我生日o既時候睇喎，都唔o岩 timing o既。唔唔~ 我都唔鐘意呢套片囉，我寧願睇北極快車好過喇，都係上次套鯊膽大話王好睇o的，套卡通片有笑位得o黎，最緊要係有故仔，睇完有種溫暖o既感覺，呢種 feeling 好好多~
o係荃灣搭車返屋企o個陣…居然又滴o左幾滴眼淚…唔，真係覺得自己太幸福同開心喇。再也忍不住了。
咁就廿二歲…阿程大個仔喇…要變得更加成熟同穩重…要學識更多更多o既o野…要照顧身邊更多更多o既人…要明白更多更多o既人情世故…最重要o既係：要學識做最明智o既決定。
我許o既願唔多，因為我不嬲都係信自己多o的囉，不過我好希望我今次許既願可以實現喇。唔唔~
