甚麼文章來的……？

　呢次等死喇…

　究竟自信同自大相差有幾遠？
　我見過一o的好有自信o既人，但係好多人時都會俾人認為係自大，最後都係不得好死，唔係被排斥，就係唔知去o左邊，加入o左獨立團體，保持中立。但係如果表現得無咁有自信，就會俾人認為係無膽、怕羞、無主見，咁樣就帶出o左一個問題喇，究竟點樣先叫有合理o既自信先？

　如何從中取得平衡？
　我自己想做o既做法：
　　步驟一：將自己所有既能力分開多方面去睇。
　　步驟二：將所有能力分開強項同弱項。
　　步驟三：再細分強項得唔得人認同，而弱項又有無被人發現？
　　步驟四：咁樣就得出四種做法：
　　　如果強項有人認同，咁就表現得有自信o的，唔怕 show off。
　　　如果強項未有人認同，咁就要表現得謙虛o的。
　　　如果弱項被人發現o左，咁樣就要表現收儉。
　　　如果弱項未被人發現，咁就要努力去嘗試o下喇。
　我就一直都係咁做，但係就唔知呢o的算唔算係平衡…？

　自信係偶然表現，定係持續表現o黎呢？
　又諗到一個問題，究竟自信係偶然o既表現，定係持續o既表現…？點解要咁諗？解一解你聽：
　如果自信係偶然表現，咁樣當有危機o既時候、有困難o既時候、有需要o既時候，自信或才能才會被展示出o黎。
　但係如果自信係持續表現的話，咁樣無論係o係任何時候、任何地方，都盡把才能展示出o黎。
　但係你要知道呢個世界係無完美o既人，無人係全能o既，咁邊會有人可以係任何時候、任何難關前都可以展示出自信？因此可見，自信出現係唔同o既人身上係會有唔同o既效果。
　以我為例，我對電腦、印o野、紙工藝，都可以表現出自信，好可惜o既係，對呢方面有興趣o既 target pool 細得很，無人識欣賞，自己有信心，不過信心只有自己知。
　而對人際關係、口才、公眾演說、唱歌，都唔可以表現出信心，不過對呢方面有興趣o既 target pool 大得很，無可耐何下我被人認為係一個毫無自信o既人，攪攪o下連自已都說服o左自己係咁。
　整體衡量下，結論係我呢個人係一o的信心都無o既，做人做到我咁，都可以話係非常悲哀喇…

　唔知係未我理解錯呢？我成日都覺得呢個世界上o既人都只係會以偏蓋全地去衡量一個人，某一方面o既方面特別出眾，例如口才，又應大勢所趨，佢就係醒目仔，反之亦然。香港就o係呢方面特別嚴重，口才好，就係一切。
　邊個未諗過識女仔呀…但係o係香港，唔識講o野，就係乜都好困難。我就唔信郭靖咁樣o既傻仔成日掛住o係大漠過日子可以咁好彩可以見到黃蓉喇…
　咁樣可以點呢？只好守誅待兔，等我o既伯樂、知音人，可以做我o既千里馬。
　或者……

　又或者……

　多麼的妙想天開… ~.~|||

　寫完呢篇o野再諗，如果無電腦、互聯網o既出現，我唔識打字、唔識整呢個網站，你o地睇唔到我呢篇日記，咁我……我未更加自閉、更加無自信……無人知道我諗乜、做乜……好可怕……

阿程@24.04.2004 對高登論壇一篇對「男仔無自信、無主見、怕羞就無用」一主題有感而發