之前死網
個網俾我玩謝左，但係呢排唔知咩事覺得自己非常之多野要攪，想拿拿聲整番好個日記都唔得呀，因為係整日記之前，首先要攪好墨魚團，我第一次做 PIC ，一定要攪到好好睇睇先得；之前要攪 ACIS 網，拖左好耐，本來進展順利，但係俾自己玩殘左個網，好驚要重新整過囉…；TKP 7a 班我又要攪個班聚，時間地點都未諗好；Soc. 紙又要設計喎；不過最重要o既係我忙緊幫田家炳中學做o野呀，有 paid 架，緊係落足心機去做喇，而家有兩份野要做，應該夠住半個 sem hall lu~ 愈多呢o的就好喇，彈性上班時間，又可以留係屋企做，一流！
今日一早起左身返 BU 開會，因為個墨魚團係 joint HKU 架，所以要特別認真，唔衰得ga ma！吸收左幾次之前莊聚既教訓，十點BU開會我預兩個半鐘車程返去，因為我好驚我好快會有個「遲到王」呢個名，我都唔明白點解屯門公路、三號幹線、美孚、長沙灣道日日都好似有車塞咁，o的時間我日日都預唔到，一時鬼咁快九個字都唔駛就到旺角，一時夠膽死兩個鐘都去唔到深水步，攪到我而家好討厭屯門呢個地方，有獨立能力的話，我一定會搬走。所以我呢個月既目標係永不遲到！
今日見早左咁多，就取道荃灣，搭 MTR 再穩陣o的避免塞車，後來我發覺，我既選擇是對的。架 59M 一路上沿住屯門公路直上，順風順水，但一到分叉線轉入丁九橋o個時就被嚇唬了，丁九大塞，我嘴角即時露出左個幸災樂禍既陰笑 XDDD，過左丁九，我就笑唔出lu…因為見到落荃灣o個條大斜路塞到死咁濟，背脊即時標冷汗，唔係冷氣唔夠，係真係驚左出黎，轉去荃灣西o個條路仲慘，一路望去完全見唔到盡頭，塞左兩個字左右，終於入到愉景新城，原來荃灣o的馬路好似係人起哂咁，連對面線封左兩條整路。真係好彩自己 choose 左入荃灣轉地鐵，如果去lai枝角轉車實遲硬到。
不過我只開心左半小時，當我邁步走出九龍塘地鐵站之際，亞士達打電話俾我…「喂~ 阿程，個會消息左呀。」我呆左，無俾到回音亞士達，真係呆左 XDDDDD，不過事件原因都唔係好事，大家都唔想，我無怪人架 :) ，跟手就諗住去 soc. 房坐番轉吹番涼個人先，坐左去保安室囉密碼入閘，但係唔知點解試左三次都 login 唔到，開始感到唔對路喇，睇一睇張紙，見到個 「YSS」，阿呢lu ya呀呢lu ya~ 我間 soc. 房係「RRS」，我講錯野囉錯密碼… 勁無奈… 非常之不願意面檬檬再去囉密碼，就走左去 common room ，又係o個個失落既五樓 common room ，我討厭呢度，因為好冷清…好孤寂… 睇左陣自己帶去既報紙… 個身又吹涼左，因為下午要番田家炳幫手做野賺錢，又未夠鐘喎，所以就去左圖書館呆下，無端端又撞到奧寶，佢個頭相當之清爽，聽日我又要剪番個先，因為佢約左人，我就上左去搵一本㊣書，叫做「羅麗泰」，絕對係㊣書黎，引文第一段就知個作者係痴線佬黎。「羅麗泰，我生命之光，我腰胯的火焰，我的罪，我的靈魂。羅-麗-泰：舌尖跳著輕快的三步舞，於上顎叩牙齒三次，羅‧麗‧泰。」，勁好笑，我要煲起呢本書佢。
單挑落旺角大快活食阿活焗豬扒飯之後，就搭巴士直接去山景，點知一上車就訓到不醒人事，訓到過哂站，到總站良景先落車，又要搭返輕鐵返轉頭…
係嗚琴站見到尋日有個女人被車斷腳o個度，又有人亂咁衝，點解o的人見過鬼都唔怕黑……
一直做野做到夜晚十二點，聽日返八點繼續做。
