有時我都諗，日記係未要咩都寫？返工咁耐，好多時都係又累、又谷氣、又唔開心。俾蕉仔提過兩提，無錯o既：呢o的o野真係諗過就算，無咩必要將呢o的無奈野去記得咁詳細喇，所以之前一排如果唔寫呢o的，真係無咩好寫。之前仲谷氣到搵 waiting 黎發脾氣添，攪到佢好唔開心。我點發？ email 囉。攪到自己而家好內咎添！試過兩次之後，唔會有下次的了。我應該係積壓得耐【做野真係會積壓到壓力既…而家睇得開o的既話，我已經唔會再有事架喇。】，又搵唔到人爆，卒之就搵左同我玩緊 email 既 waiting 係咁寫左好多好 hurt 既野出黎喇。之後一次就因為好眼訓，又燥，打電話時講左o的無經大腦仲好 hurt waiting 既野，又衰左。而家睇開左就好好多喇，雖然距離好遠，但係而家都 feel 到 waiting 就o係隔離， lonely but not boring la~ 又試甜絲絲，我無理由會再發脾氣喇。
其實做左咁耐，真係學左好多野，我覺得自己已經同其他同事做既野已經差唔多喇，一個人都可以 handle 到成份 audit report ，由頭做到尾，唔駛下下問人，做野速度又快o左好多，KO 完一份野仲有時間同o的女同事吹下水添。【點解係女同事？因為呢度無咩男仔。】有咩好吹呢？開頭最近 hit o個套「危險人物」，之後就會講呢排去邊食野，我都收左唔少風，邊度有好野食。最後，呢排都會無端端燒到我o個疊，講下 lovely waiting ，而家成公司既人都知 lovely waiting 8 月 18 號就會返黎喇。而我 17 號就會唔撈~ haha~ 仲有…o的同事話我平日就 cool cool 地，但係一講女朋友就會不其然咁微笑……唔講唔覺，講開好覺。
1. 因為之前一日我o個 part o既「稅法」分部完工，所以之前一晚就大抖，今朝訓醒覺見精神就戴番 con ，揀件 sharp o的o既 shirt 著。返到公司…成朝班女仔就話我做乜扮靚仔…仲有個話：你都係戴 con 靚仔好多！…仲入埋瀟洒組添【香港先生分健力組同瀟洒組…】，成朝我都唔係幾自然，尷尬到呢…
只不過係 office 無咩「男仔」，佢地大驚少怪o即…
2. 今日有個女同事 Isabelle 生日，成班同事出 job 既返哂黎拉大隊去就近飲茶，返黎既時候同個 check 我功課既 supervisor傾兩句，俾佢讚我做左幾份 report 都做得幾好呀~ junior 黎講算係好好架喇，第時出黎做番 audit 都係差唔多架 jar~ 當然大公司做 investment 同埋 consolidated 既就麻煩得多喇，但係都係用呢幾個 procedures 架jar~ 講真，成十世未試過俾人讚過做野好。咁我唔習慣，又要謙一謙咁，佢就話唔駛咁無信心喎，已經做得幾好喇。
3. 飲完茶就跟一個同事去尖沙嘴康X廣場出 job ，之前我咩資料都唔知，去到呢個康宏呢橦商廈…俾佢既排場震懾…地下大堂三層樓咁高，乜都無，得個大噴水池同埋一條電梯上二樓，好靜咁上到二樓，即刻有個 feeling 係…呢度係商廈定酒店？我黎做野定渡假先…？地方大到呢。我真係細路仔，無估過原來做野既地方可以咁有氣勢，我以為剩係去歐美團先會感受到呢種感覺添。
上到去o個間公司既 2X 樓，又俾個 reception 位嚇親，地方大到呢，燈光控制得好鬼 pro ，但係坐o係度既係個好似做 courier 著恤牛仔褲既 賓妹。「下…？！」入到去，呢個 office 地方好遼闊，燈光充足，周圍全部玻璃直望哂街景，o係度做野，環境方面簡直就係享受。但係地方可以容納 50 人既公司，睇極都係得 20 人唔夠，其他位係用黎放雜物會唔會離譜左o的？做要 20 人全部都係師奶型，個個著到好似去買咁，我又呆o左…
我同同事被安排左去個 conference room 度做 audit ，呢間 conference roon… 實用面積大過我屋企建築面積。入面乜都無，剩係中間得兩張四人用圓檯， total 八張椅，所有牆都裝左玻璃款既九尾架，放哂間公司既盒裝 products ，o個氣氛好似入左去 Toysrus display 部或者家樂福既家具部，仲俾我見到有個 product 係隱形胸托…有玩具、廚具、跑步機咁上下，但係點都未夠呢樣滴汗…我一坐底張椅度，成十米長既玻璃牆後面既全景維港景色入哂我眼簾…由頭望到尾…o個一下呢，感覺係好有成功感架，好舒服同埋好容易就有好 proud 既感覺。
我急不及待睇睇呢間公司既機密，買左五十幾部 LCD mon..? 望出去只係見到唔夠 20人 既屋村師奶 jar wor..? 計埋o個三個坐房既沙特老闆，都唔駛五十幾部 LCD mon 嘛？ 再望營業額…勁…再望 salary …下！？唔係化？ 一千二百幾萬！即刻擰個頭望出去，呢廿個師奶一年分左成千二萬！？香港地真係地靈人傑…net profit 無上市既公司都六百幾萬…勁賺錢，咩生意黎？星期一再探討一下。
4. 跟住呢晚訓覺， lovely waiting 半夜五點幾打黎喎，嚇醒哂~ haha~ 不過甜到呢…內容唔講得喇。
