o係我唔知悉 BNO 要有半年有效期呢o的愚蠢o既錯誤下，因而我同 lovely waiting 去台灣既畢業旅行就咁而泡湯既一星期後，一個短線既澳門團終於可以成行喇。

　應 waiting 既要求食盡澳門美食，我籌備o左一日終於完成左呢個美食自助遊喇！開始之前，就等我寫一寫個 checklist 先。 

• 官也街誠昌飯店 – 水蟹粥
• 大利來記咖啡室 – 豬扒包
• 瑪嘉烈 – 葡撻
• 禮記 – 雪糕磚
• 六記 – 紅豆餅
• 榮記豆腐麵食 – 超滑豆腐花
• 洪馨 – 椰子雪糕
• 安德魯餅店 – 葡撻
• 咀香園 + 鉅記 – 試食
• 官也街 – 大菜糕
• 大三巴 – 串燒
• 山度士葡式餐廳

　如果真係照住呢個 checklist 去食既話，我諗我地呢個兩日一夜既行程真係要每半個小時就要坐底食一食，所以當然實際上我地無去哂咁多地方食野喇，但係唔好睇少"我地"【可以只係我至o岩… waiting 而家已經話唔可以再食咁多野咁話…】，我地試左佢七八成既野！

　好喇，今日既旅程一開始我地就買左個麥記早餐上船食，十點三班船我地早左幾個字就食住野先喇。香港個海岸真係愈黎愈唔掂，咁窄攪到靠岸邊非常之大浪，我同 waiting 都擔心過會唔會因為咁攪到我地暈船浪。好彩無風無險之下比正常時間遲o左十五分鐘抵達澳門o既港澳碼頭。上岸o既o個一刻，感受到呢度有o的似大陸o個陣味，可能都係因為咸淡水交界o既關係。

　上到去，我地就上左架免費既接送巴士去左我亂咁揀既酒店 – 皇家金堡酒店【好彩亂咁揀都揀左間 ok 既，好近碼頭，地方細少少，不過總算唔錯】，攪掂哂o的 check-in 程序後，我地就開始我地恐怖o既一日喇。

　o係我個計劃入面，我係要首先去左路環食左o個個安德魯葡撻先既，但係我估唔到原來o個架 26A 巴士要等咁耐，路環仲係一個頗遠既離島黎既添。呢鋪真係出師不捷，攪到我地坐車等車都攪左成個幾鐘就係為左個葡撻，如果個葡撻唔好食，我呢次死緊喇。坐左一輪係咁轉回旋處既路之後，我地終於落車喇，亦都好容易就搵到o個間安德魯餅店，影左幾張影之後就入去買野食喇。

程：「【廣東話】唔該兩個葡撻同埋呢支檸汁丫。」
男店員：「【不知甚麼話】巴士招~!」
程：「【廣東話】咩話？」
男店員：「【國語】這裡八十九~!!」
程：「【笑死人o既國語】甚麼八十九？兩個葡撻和這支八十九？！」
男店員：「【國語】十二隻葡撻八十九呀~!!!」
程：「【尚算國語】這不是我的！」
男店員：「【國語】哦~? 那這支九蚊~」
程：「【開始含糊o既國語】還有兩個葡撻呀~!」
男店員：「【國語】呀~ 那二十一塊~!!」

　哈哈~係呢一輪 conversation 之中，企o係我隔離o既 waiting 都唔知我地講緊乜~ haha~ 呢個男店員真係應該拎去填海。好彩o的葡撻都唔錯，不過好似唔值坐咁耐車o黎o即…
　checkpoint: 安德魯餅店 – 葡撻

　食完葡撻我地就行左陣後面既十月初五馬路喇，呢條路係幾靚架，不過就臭o左o的， haha~

　行完之後我地就回程喇，又係搭番呢間車，因為豬扒包一定要三點出爐既關係，我本來計劃好既行程要大更改，縮減o左o的路線之後就要拿拿臨去左"乙水"仔食左豬扒包先喇，但係我仲係一個大鄉里，搭完車去到乙水仔之後都唔知點行，條條路都差唔多咁，o的路名又難明，卒之我頂唔順行去問個女途人- 一個師奶。

程：「err~ 唔該…~」
女途人此時即刻向後彈開三步！覺得我好似有菌咁o係我一米範圍外閃過，目光兇巴巴地無離開過我。
我都幾無奈咁望住佢…
程：「唔…唔好意思…無乜野喇…」
我嚇親佢o的乜o野呢？唔通我隻腳生o係個頭度？百思不得其解…

　行到有o的煩躁同埋悶熱之下，我同 waiting 選擇去搭的士去官也街呢條澳門食街，點知原來只不過係十蚊車錢！仲好鬼近添！難得同個司機大佬講到兩句，我先知原來o係澳門講街名、講店鋪名係無人會識既，要講既就話食豬扒包、葡撻之類先會明咁話…咁o即係o的街名要o黎做咩？haha~

　去到大利來記咖啡室落車，一落車就俾我見到一個好似 Kitty 既人，我心諗：咁都撞到熟人？haha~ 行埋去講兩句果然無錯，我同 waiting 秘密去左澳門都可以見到 BU 既同學仔，佢仲同兩個其他 option 既同學一齊o黎添。寒暄一番後，我就同 waiting 去左條食街睇下有咩食先喇，因為未夠三點鐘豬扒包出爐嘛。

　係呢條街，差唔多想要搵o既食店都出現哂係度呀。首先我地食左個大菜榚先，之後我地發現有間叫 "天娜餅店" 賣榴槤雪糕？ haha~ 跟住見時間都差唔多喇，我地就番去大利來記等豬扒包，我一坐定就醒起o的書話佢地o的咖哩魚蛋都係幾好食咁，我就叫左碗喇，估唔到咁大碗… Kitty 佢地無耐都返o左o黎一齊等食豬扒包，好好笑咁佢地話我地知原來佢地成朝被困黑沙灣【我心裡暗度好彩阿行前幾日同我講千萬唔好去黑沙灣o即，如果唔係行到 waiting 腳斷都似】。只係一陣既時間，o的豬扒包出爐喇！只係見每一檯都叫四五個包，最重要係每一檯都叫o個度厲害，有o的仲叫外賣，成袋十幾個咁拎走…真係好誇張。
　checkpoint: 莫義記 – 大菜糕 | 大利來記咖啡室 – 豬扒包

　食完豬扒包之後，我地就行上去前o的o既龍環葡韻住宅博物館，呢個係我同 waiting 黎澳門咁耐既第一個歷史景點。同埋 Kitty 佢地組隊一齊行，o個度o的景認真唔錯，我地都影o左好多相呀。但係之後俾錢入去o的博物館入面【學生價只係兩蚊！】，又發覺好似無乜野睇咁喎【我同 waiting 係非文化愛好者黎…】。卒之我地打個白鴿轉就同 Kitty 佢地分道揚鑣 lu~

　我同 waiting 行番落去就搭巴士去另一個景點 – 大三巴。我地又係唔太識路嘛，所以就持住路在口邊既philosophy o係車上面問，好明顯，唔係個個澳門人都唔好客o既。今次呢位姐姐真係非常之熱情咁指引我o地，仲有o的似熱情過度添。

　我地係度影左唔少相，咁當然影完相之後又係食野喇！ haha~ 費左一番功夫之後，我地好順利就搵到 Kitty介紹話好好食既雪糕 – Milk Top 。o的雪糕真係好味道，仲坐得好舒服添，最過癮係見到兩個麻肋仔係度識兩個雪糕妹妹。 hahaha~ 不過我同 waiting 就覺得好嘔心喇。好喇，食完雪糕！我地又要去下一站食串燒！可能真係好 tired 喇，同埋澳門半島o的路九曲十三灣，再加上o的地名有等如無，地圖都搵唔到，我o地係咁圍住o的地方係咁轉，仲吸埋o的繁忙街道o既汽車廢氣。好難頂！God bless 之下 finally 俾我o地誤打誤撞搵到o個間期待已久o既串燒檔，我就食左兩串， waiting 有o的飽食左一串。嘩… 唔講得笑！o的串燒真係我咁大個仔以o黎食過最好食o既串燒！串雞食燒得o黎一o的都唔乾，仲非常之入味，我覺得呢檔o野已經係o黎澳門必食之選，同葡撻 and 豬扒包列入三甲。
　checkpoint: Milk Top – 雪糕 | 串燒檔

　食完之後，我地就嘗試去搵下一個地方食野喇，但係呢度呢o的路真係異常地難認難行兼混亂添。我已經行到無咩心機，見到個警察，我未又走上前問下禮記雪糕o係邊度，點知個警察好似唔多知咩係禮記咁，我再俾埋個街名佢。佢既反應係叫我唔好食o個間喇，o個間唔好食o架，去食議事亭o個邊o的台式食品仲好食。我都無唔表情俾佢喇，我問你禮記係邊，你叫我食第二間…後尾佢叫上前面轉呢度又o個度咁。即係我地都係搵唔到…

　差唔多天黑喇，o係我地左轉右轉之下終於o係一條好多車既馬路旁見到禮記o既蹤影。入到去就整左半磅雪糕磚同埋 waiting o既三文治雪糕。不過佢地o的服務態度真係非常惡劣…真係老店唔憂做。
　checkpoint: 禮記 – 雪糕磚

　過左呢度之後，我地都無心機再搵埋其他咁隱閉既店鋪喇，就再搭車返乙水仔食街食我地既葡國餐喇！我地跟住本書既介紹試下o個間話有家庭風味既山度士葡式餐廳。入面真係好有葡國風味，而且入面好多外國人呀…差唔多七成人都係外國人黎。我地叫左葡式炒蜆、白汁牛肉同埋個葡式炸子雞。三個食送都非常美味呀！清淡得黎之餘有夠鮮味喎。而家講講下好肚餓喇…好想去食多次添。因為當時實在太飽喇，o的炸子雞我地都要外賣打包。
　checkpoint: 山度士葡式餐廳 – 葡國餐

　食完野真係 feel 到好飽喇呢次…我地就再搭車去返澳門半島o個邊，因為我地都要首次入賭場呀！我地選擇o左金沙，因為o個度好似較為新嘛。入去之前要 check 袋 check 成…我盒炸子雞就因為咁而要被掉棄左呀【慘】……入到去行左兩個圈，入面真係好鬼靚下，但係想像到班賭徒並唔似係小賭怡情o既心態時，我就無咩 mood 喇。卒之我同 waiting o係上層一個頗為遠既角落度搵到o的一蚊一鋪既老虎機。我同 waiting 加埋換左四十蚊玩左我地半個鐘。haha~ 本來我地可以贏到去 $45 架，但係我心諗不如贏夠 $10 先搭的士番去嘛。點知就係咁，連 $40 都無埋。 haha~

　玩完呢個之後我地就搭的士搭酒店 settle lu。 

　第二朝起身，出面好似雷雨咁，睇電視見佢由黃雨變紅雨，又紅雨轉黑雨喎。oh, 睇黎今日我地都無可能上到去旅遊塔同埋去漁人碼頭影相。最後，我地就決定左去返乙水仔食誠昌飯店水蟹粥喇。o的水蟹粥又無想像中咁好味既，唔通真係好似上網o的人咁話，個廚師過左檔？
　checkpoint: 誠昌飯店 – 水蟹粥

　食完 lunch 之後，再去鉅記買左好少手信，我地就搭車就人lu ，見我地都未夠鐘上船，就過附近既新八百伴行下，又去美食廣場食o左o的o野：楊支金露同埋一個 New York Pizza ，waiting 話都算係唔錯喎。

　之後終於要上船離開澳門喇，今次落雨有好幾個景點都去唔到，不過唔緊要，咁近可以再同 waiting 遲o的去多次呢。有 waiting 陪住去下旅行又真係好 lovely, sweet 同 funny 架喎~ haha~

This entry was posted on Friday, June 9th, 2006 at 6:50 pm and is filed under Life whereas tagged with nothing. You can follow any responses to this entry through the RSS 2.0 feed. You can leave a response, or trackback from your own site.