Year: 2009
Thoughts about…
-
Back to school…old days…
今天應尹仔既邀請返左母校中學度玩三人籃球賽，身體唔夠 fit 又缺乏練習，一早已經知自己表現唔太好，但係估唔到少文、小丸、震宇&尹仔都似乎唔好得我好多，唔通我地真係超哂齡，只係一隊魚腩部隊嗎？不過我都無得唔甘心架喇，始終花時間去練習就算做到世界第一都無用，同我個人生目標唔一致。 haha~ 十年人事幾翻生，何況我地都係成十幾年既老野，返到去真係唔知點咁，一個人都唔識，真係元老隊黎！ haha~ 連 Miss 阿 sir 都無哂我地印象，其實都無話唔悲哀。 Anyway, 就算記得我，我諗記得我既都唔會係o的乜野好事。 p.s. 最後，我地團體賽包艇，但係我成 full team “協助” 尹仔成功奪得三分王既殊榮，總算有收獲！ haha~
-
From poison to poor worker
你地可能都會定期去某一些網站，我大大話話都有成十年上網經驗，當然都有一些推介。當中我比較 like 既有 Mobile01 呢個毒物網，可謂毒物？入面所介紹既產品都係一o的高消費、用黎享受生活既劇毒介紹。我個人常去既有居家房事區，佢地圖文並茂咁介紹一個家既誕生情況，某一o的真係非常精采。 我鐘意室內設計，留意好多呢方面既資料，就呢一排我仲搜購哂 Editions de Paris 編著既有關書籍，呢o的都係一o的雞精工具書黎，不消半小時就可以睇完一本。但係每睇一本都會心裡面感嘆出黎：「嘩，o的顏色真係靚到呢…」「呢o的未就係識得享受生活囉…」將來有機會我一定會進修一個室外設計既文憑，同埋憑自己去裝修、配置自己既傢俱，創造出自己既家居風格既！話時話，一直都係唔講可能唔知，我有一o的地盤既工作經驗，好多聽完都話，你唔係掛？可能一黎嫌我太瘦，或者可能係我有番咁上下學歷無咩可能咁。但係事實就真係做過，而且我覺得o的經驗仲好保貴添，起碼以後好難有機會會再試。 係喇，我之前曾經去過屯門既青松觀度做苦力。因為一年一度既廟會即將舉行，青松觀希望造一大批大型可活動既層架出黎。就係呢個機會，我俾個朋友介紹下就展開左我中七後既第一份暑期工，一做就做左三個幾月。好記得番工既第一個禮拜同樣有個中七畢業生入黎做既，就被派去燒焊，中午飯前發生意外，o的燒焊灰彈入眼內，即刻入左醫院之後就無再見過佢了。我都算好彩無穿無爛，雖然真係辛苦，要擔擔抬抬，同埋爬上爬落，用A字梯夾下夾下進行高空工作，掃油上螺絲咁。仲有次陳師傅捉我埋一邊教我做事我仲記得，佢話出黎做o野最緊要唔好怕蝕底，乜都要肯做。 好可惜，係而家呢個社會上，一切都要講求效率，我終於明白唔好怕蝕底呢個諗法係職場上會累死人。因為戰場上時間就係金錢，你做野絕對要有個諗法就係一定唔好蝕底，做自己安份既工作，不在其位，就不做其事。唔係自己個 position 要做既野，就要識得 delegate 出去，要分好輕重緩急。如果唔咁做，乜都自己落手落腳，到時真係有苦自己知，無人會可憐既！
-
Do it immediately!
今日正式實行擺脫窮忙既第一擊，感覺非常良好，haha~ 兩個禮拜前，到處去覓尋一本可以隨身攜帶既手寫筆記簿，終於去左三聯用左二十蚊買左本 Kokuyo Campus 100 sheets A 7mm Ruled 30 Lines 既 notebook，入面記錄哂我所有既事情，心得、目標、工作既記事、to do list…乜都有。我每一日既行動，就一早搭車時紀錄下來，或者早一晚計劃好，感覺非常好，所有野都係掌握係自己手裡，胸有成竹的狀態，一切都係自己控制既感覺，無哂命運弄人既 feeling~ 好似今日咁，用尋日學會既艾森豪威爾原則 (Eisenhower Matrix) 將brain storm 出黎 to do list 入面既工作分類好，連無安排過今日突如其來既 interview 都處理埋，仍然可以從容係七點鐘回家溫習。如果我可以做到，並養成習慣後得到成功，我一定會將我所得既同大家分享。 我最新既 personal statement 係：每朝起床就諗 Do it immediately! Do it immediately!! 這是參考克里門史東的方法。 btw, 點解咁多人話宮心計個佘詩曼正，haha，唔太識欣賞，佢正係邊？
-
Summary of the week
近排放假溫 FRM，好彩有熙既幫忙，先唔駛走咁多怨枉路。用本 handbook 做 major book, 反而用 study books 黎做 minors 。睇睇下好似睇故仔書咁，識就睇多陣，唔識就飛。哈哈哈~ 睇左成年個樓市，見有用既 article 就 copy and paste 落 Google document 度，而家睇得多&分析得多總算有少少結論，東涌藍天海岸/東堤灣畔落番 HKD2,600 至 HKD2,800 一尺先會再考慮喇！如無意外，下年年中可以順利上車！
-
Target and Audi A4
又一次深夜時份放工回家，今次落車行返屋企同平時有o的唔同。係呢個貧民區屯門居然見到一個美女入左架 Audi A4 Avant 撻著車匙，我不期然停步望左幾望，一黎係因為 Audi A4 Avant 係我架 dream car, 二黎感到奇怪個美女咁後生好似已經發左達咁，唔通係做 i bank 既？, 三黎就諗點解呢o的組合會係呢個時間呢個地點出現。再望一望架車同埋架車入面個美女，真係好 cool! 鏈一聲，架車就開左去。 真係酸到好葡萄，即刻心裡有股雄心壯志呢生人要盡快出人頭地。但係點樣做呢？窮忙族一書又有教，呢本書真係我既聖經黎，要好好鑽研。 本書有個 concept 係要我問問自己未來既五年你想你自己擁有甚麼，會點樣過生活；我呢？就唔駛好似o個o的醫生律師咁係港島樓先叫做樓既，做會計師既我希望五年後係東涌港鐵站附近自置物業，有樓有瓦遮頭，正式成為中產既一份子。同時我希望可以買一部 Audi A4 Avant 用黎做 holiday car ，用黎改善生活。 五年目標已定，再黎就要有倒推既方法黎實現目標、達成目標；四年時我一定要有一筆首期加裝修費用，仲有一筆多餘資金做 buffer。用一年時間留意樓市，選中單位就用預算購入。三年時要重新檢討自己做儲蓄、再一直微調好，跟足 budget 安排駛費。而家我要有一個收入支出既預算表，安排好而家人工既儲蓄安排，投資比率等等。呢個係一個大概既想法，當然我有個 excel document 有哂我所有既 step 同埋 small tasks 既要求喇。 再之後要做既就只係跟住個計劃處理，目標係確立時已經權衡左利弊，同埋付合左自己既最大利益。呢五年間，除左諗可以點樣絕對地利用時間同埋有效率地倍化時間的利用外，實在無必要再諗點樣改變個目標。如果唔係，到頭黎又係只會一事無成。 其實我個目標係一前前已經定左，而家已經做進行中。有效地利用時間，朝著目標出發一定會加快成功！
-
Group of working poor
一直都俾多人訓示我做野無效率，俾唔到一o的有質素既工作表現出黎，同埋一o的時間管理技巧都無。其實缺點既野唔想認都要認，自己投放左咁多時間去工作，犧牲左健康、犧牲左女朋友的時間、犧牲左同家人既時間、仲犧牲埋上高登網網站既時間。但係仍然無滿足感，事情依舊，是非依舊。真係好無癮。 最近去書局睇到呢本書，介紹一下窮忙族，點樣可以不成為一份子。發覺呢個主題完完全全切入我本身既問題，裡面清晰分析，深入淺出，愈睇愈有趣味，愈睇愈發覺有啟發性。hey, 劣根性，一定要根治！
-
Three years an end?
做 audit 都做o左成三年幾喇，終於考完試拎得牌，算係繼讀完大學後完成o左另一個里程碑。帶係就換o黎一身病同埋無哂社交圈子，而家要開始諗諗o既係仲值唔值得留係 KP 繼續做？ 兩年前滿懷希望同自信入到呢間 firm 以為前途無限，一開波就拼命做，唔係自己自大，因為始終年紀較大，又做過o野有經驗，造到個 image 真係非常好。但係就咁被挑入先聲 team ，半年時間就好似泡沫爆破咁現唔形，唔夠料但係又身負重任，唔識做、學唔黎、真係做野做到唔訓都做唔哂。 個 image 一個月就無哂，個個 in charge 一下子就知我充大炮。身子捱壞了，暴瘦又精神緊張，率之而家要長時間食藥。 某一個星期五的下午，一個有實力o既 senior 著我去 pantry 坐坐，真情對話同我講那兩年大家對我的評價如何。我一直心知肚明自己表現，但係都忍唔到，就係個 pantry 度喊。實在忍唔住，一直受住極大o既壓力、一直覺得內咎對唔住隊 team 、一直覺得自己做到全力都唔會有好評價……就好似缺提咁散哂o的怨屈氣出o黎。無錯， senior 始終係基於無放棄我而做丑人，鼓勵我要爭氣。但係呢個始終係我其中一個選擇。 而家有個機會係度，公司有得 internal 做 secondment 去 techical department 一年，我已經打算嘗試一下。如果第時有機會，再試一試做 global secondment 對自己o既仕途應該仲有益處。 分亨一個故仔好適合而家o既我： 老鞏在貿易公司上班，每天總是埋怨懷才不遇。一天，他忿忿不平地向朋友小李抱怨說：「老闆總是不把我看在眼裡，我很想對他拍桌子，消我心中怒氣，然後辭職不幹！」 小李就反問：「你對公司業務全盤理解了嗎？」老鞏回答：「還沒有！」 小李笑著說：「君子報仇三年不晚！我建議你先將公司的貿易技巧、文書、老闆的經營理念、行銷通路等弄清楚，把公司當作免費學習的地方，等所有的東西都學會之後，再一走了之，這樣不既能出口氣，又有許多收穫？」 老鞏聽了小李的話，決定下班不急著回家，繼讀留在公司研究各種業務。 經過一年，小李跑去慫恿老鞏：「老鞏！你現在全部都學會了，應該可以走人了吧！」 老鞏搖搖頭回應：「你知道嗎？這一年來，老闆對我的態度簡直是三百六十度大轉變，還將公司最重要的任務交給我處理，不僅升官又加我薪水，我現在成為公司的紅人，我決定不走了！」 俗話說：「英雄不怕出身低。」一個人只要肯努力，就能戰勝先天不足與惡劣環境。科學家有新的發明，作家寫了好作品，商人的貨品大賣，都是經過長期辛勤的學習與磨練。所謂：「臺上三分鐘，臺下十年功。」一個人縱然一時得到了權力或地位，但若實力不夠，不肯繼續進修新知，未來將會被社會所淘汰。 真係要有積極o既想法繼續努力，不如俾自己一年時間去調理好自己身體同心理，再回來戰場努力作戰效果應該更好吧！ 註：男人老狗，其實我真係一個好眼淺o既人。
