Old age aches

用左個牙箍之後,個人訓覺無再嘈到老婆,日頭係精神左,但係右邊牙骹一合埋就痛,痛到食唔到野,反而可能仲可以減埋肥,一石幾鳥,所以其實係應該繼續 keep 住用。

右邊牙骹應該係好多年前打波俾人手肘打批中,記得痛左好幾日,無理佢,唔大力咬嘢同擘大口就無事,但係而家又痛翻。

上網見到有呢啲練習試下。

DIY: 
1站在鏡子前面
2用一支竹筷子橫咬,越向裡面越好
3上下門牙中縫對齊用力咬
4用手按摩傷側關節,然後邊按摩邊用力咬一下放鬆一下,這樣做15分鐘

一天做三至五次,這樣做幾天以後就會比較好了,這樣就能慢慢改善了,初期咬的時候如會很痛,力道可以放輕,等比較不痛時再加重力道

連結

Raining in Shanghai

今日放棄左無出街,因為實在太熱同埋無體力喇。琴日行左幾個鐘就成身滾哂,又頭暈,好似中暑咁。今日都係留係房休息下。睇埋本七月號 GQ 同埋 “What the Most Successful People Do Before Breakfast”。Btw, 出面又下雨…

P.S. 下次出 trip 記住帶 Canon 部計數機同埋 Nike 對輕量跑步鞋。

Shanghai

留係上海第三天,開始有的悶。其實我係上海有幾個朋友,應該要找他們出來聚會嗎?
一個人夜晚食完 Pizza Hut 諗住周圍行下,睇下酒店出面有塊空地好多人跳社交舞既畫面,點知行行下落雨,半路中途要跑住番o黎真掃慶。
聽日去邊好?想一早去樓下 Starbucks 買杯 Grande Latte 坐係室外觀察上海?

My dad

老豆星期日晚走了,佢走時只得一個人,係深圳灣口岸前面,仲未過關。

佢係一個好硬頸又頑固既人,佢決定左既事就一定要去做,唔會改變。食左幾十年煙,聽講佢十幾歲就開始食,大約十年前開始轉食左大陸煙之後就一直咳嗽,每一晚都豪咳。家人朋友都叫佢唔好食,佢唔信,一直話唔係o的煙事,只係因為佢要捱夜開工而身體變差。反反複複咳左幾年,體重愈黎愈輕,精神愈黎愈差。有一晚咳到扯哈咁樣,我地送左佢入醫院,確疹患有慢性阻塞性肺病第二期,照肺成個都係黑色,肺功能得五成。全屋人勸佢戒煙,戒了幾星期,偷偷地又食,最後仲明目張膽食返,勸極都勸唔聽了。

佢最自豪係佢架吊機車,自己掙住架廿幾噸吊機車周圍做野,佢鐘意自由,唔駛睇人面色。一做就做左超過三十年,是行裡的老行尊了。佢整車有一手,全部都係俾車車行整時偷學既,因為兩協插刀幫人整車,又為人疏爽,因此有一大班老友。有一段時間佢去太子大廈換玻璃,而我又係o個度返工,會同我講佢係o個度返工,同我展開話題。而有一次我call左姨丈架的士,又見到老豆架車,走上前一睇,見到老豆開工,同緊姨丈閑話家常,感覺有點親切。

佢又要認叻自己識呢樣識o的樣,自己乜都頂得順,甚至連自己病都相信會應付到過去。

佢好照顧大陸o的親戚,仲同我講要點樣點樣就可以上到去咁樣。阿嬤死前我知道我阿爸好孝順,所以要經常上去探阿嬤。阿嬤走左之後,老豆都仲keep 住上去,我知道係因為佢係o個度長大,佢係o個度有情意結,同埋係o個度唔駛成日同阿媽吵鬧,又可以熱鬧o的,同埋好多親戚都尊重佢。

佢份人好要面子,就算自己分無多餘錢,有客人都要請客。呢幾日我地幫佢銀行戶口打簿,只有六百幾蚊係身。感覺好心up,老豆無錢連問我地拎都唔問。我地知佢臨走前仲開左七日八日工,點解唔拿拿臨賣左架車,等自己多啲錢旁身?

今年三月的時候曾經因缺氧而入急症室,頭幾日插住肺喉講唔到野,又要用昏迷藥,到佢醒番o個時,痛到佢不得了,初初一個星期,病房唔俾我地留底,星期五朝無端端就話佢又昏迷過一次,要馬上急救,就咁樣我請左一個禮拜假每一晚都陪佢,因為佢好怕一個人寂寞係醫院,怕唔知o的醫生點樣對佢,我同阿媽輪留陪佢,日頭阿媽,我就留夜晚。因為佢出唔到聲,每晚我都握住佢隻手,叫佢一唔舒服就用力握我隻手一下,我會馬上叫人幫佢。佢康復得好快,但係醫生要佢觀察耐o的先出得院。有一晚我陪佢見住隔離佢老人家過身,我地都無乜聲出,佢剩係細細聲講:「唔好望。」我之後出左病房去一陣,佢就不停叫姑娘阿仔去左邊?我知道佢好怕失去家人,怕寂寞,想有人關心佢,但係又要面子。

出院之後佢決定戒煙,食埋最後幾支俾鬧佢之後就無再食,身體都健康左起黎,食多左野,夜晚無再咳,更加無埋嚇人既喘氣聲。

我平時工作好忙,每晚都做到三更半夜,佢在世時我最後見佢係係湖光樓對出個巴士站,我八點鐘排緊59x 巴士等返工,佢騎住單車速出馬路去佢個車場,佢好似平時會習慣望一望我係唔係度咁,終於今日佢見到我,就笑笑口揮左一揮手打招呼。我奇怪佢去緊邊?仲去返工咁好精神同氣力?佢呢次揮手係我呢生最後一次見佢……

佢臨走前幾日收到大陸o的親戚話四叔攪大生日,邀請佢返上去。問過佩佩唔去後,因為我晩晚加班無返屋企食飯,都無問我陪唔陪佢上去;不過佢今次又唔似以前咁搵人一齊上,佢就咁一個人星期日朝早上o左去。我星期六都工作到好夜,星期日一訓醒就一點幾,阿媽醒覺地叫佩佩打電話問佢係邊,佢答佢自己返左大陸,今晚會返黎後就收左線。佢呢兩個月一直都健健康康,大家警覺性都變低了。之後再收到關於佢既電話就係佢出事既電話。

佢就咁就走左,唔知係大陸o的救護車黎唔切急救,定係根本無人係佢最需要人時黎救佢。無論係點,另一方面看佢起碼唔駛再受急救插肺喉既痛苦,又唔駛再困住係醫院個幾兩個月。或者老豆咁走係佢最自由自在既方式。但係老豆我仲好掛住你,你勞動左大半生,我都未報答你你就咁走左;你都未退休你就咁走左;你都未睇到我結婚你就咁走左……

It’s only a job

其實我都係想打份工啫。我係有問題,但係事實上做咁耐野真係有彈有讚,會唔會只係人夾人緣咋?但係老實講,就呢件事黎睇,佢做得一啲都無錯,而且comment真係好需要,如果唔係,我係永遠唔知自己係做成點。

再睇翻個事實,我係唔係仲適合係度?呢個問題做咗咁耐都唔係而家先諗,我個career path係點,唔係做一隻job就清楚哂。

既然話我會升到,而到時做唔做到大家都話唔定,始終成個job duty 都唔同哂,我會全力以赴,做到最好,邊個係天生就識哂所有野。點解我唔升咗之後再答你呢個問題?