一段時間無再寫 blog ，因為經歷了一個小低潮。

一直都不停同身邊o既人講我無得再過朝九晚六o既生活喇，因為我去 DPP secondment 個 program 正式結束，而家又要過番以前o既工作環境，真係怕適應唔到。同埋工作氣氛消極，要重新認識新同事，重新認識新工作方法，同打過一份新工無乜分別。

最後一定係用一句總結睇怕我都頂唔到好耐，要搵定工快o的離開先得。幾乎日日都係咁講，講到好悶，所以更加唔想係自己個 blog 人度寫出o黎。

不過呢個星期出o左一隻 job ，遇到個新同事令我有新o既感受。

佢令到我覺得自己對 audit 好似重拾到一o的興趣，有信心同動機去做好呢份工。我似乎仲有好多o野未學完。我返番去唔係回到起點，應該係有機會可以由起點開始，俾多次機會我用最佳姿態跑上終點！

Objectives of 2011:

• 學最好o既英文、睇最好o既英文、聽最好o既英文、講最好o既英文、寫最好o既英文、諗最好o既英文
• 係呢度跌低，要係呢度企番起身！
• 準備成為一個出色o既會計師
• 安居樂業
• 應麥玲玲o既預言！
• 法律與我
• 家庭關係
• 身體健康 workout

今日下午公司無同事無人陪要一個人食 lunch ，又去翻我個飯堂大會堂隔o黎o個個美心 MX 。當我一路排緊隊仲心大心細唔知食乜好o既時候，聽到後面有兩位先生幾令人會心微笑o既對話。

「你食乜呀？」
「最平o個個飯係乜？」
「就咁睇，雞扒飯就最平喇，27.5。咦……！但係無o野飲o架喎！」
「咁仲有無得揀呀？」
「見到有北菇蒸雞飯 29 蚊連o野飲！」
「咁都係算喇，雞扒飯飲杯清水算喇。」

我本來睇到個 30 蚊o既焗海鮮飯好似咁錯，起碼唔係我成日食o既六寶飯轉米粉咁悶先。聽完佢地講之後，同埋諗過o下其實個個餐咪又係一樣，所以就跟o左隊，叫o左雞扒飯加雜菇汁。

跟住我就聽到售賣員話一連三個菇汁雞扒。其實一直無留意開，原來我前面個位先生係叫o左北菇蒸雞飯，叫北菇蒸雞飯唔奇怪，奇係奇在原來佢叫一碗一早蒸好o既北菇雞飯加飯，我一直只知碟頭飯先有得添飯，唔知咁樣一碗 preset o既餐都有得加。最後我見餐飲部o既職員要拎多一個碗加多半碗飯俾佢。

前面位先生生活迫人，睇o黎要三餐當一餐；後面兩位先生算無可算，個半都係錢睇o黎真係無辦法，慳得一蚊得一蚊；中間呢位先生唔知幾時先上到車買到樓，真可悲呀。

老豆生日，為o左迎合佢o既口味，我o地一家入o左流浮山食海鮮。比我想像中又平又正！唯一美中不足係重頭戲o既炆魚頭因為店家同我老豆溝通有誤，制法唔o岩心水攪到成半碟無食到。月中會再o黎多餐勁o既！

Read the rest of this entry »