Tag: lunch

今日下午公司無同事無人陪要一個人食 lunch ，又去翻我個飯堂大會堂隔o黎o個個美心 MX 。當我一路排緊隊仲心大心細唔知食乜好o既時候，聽到後面有兩位先生幾令人會心微笑o既對話。 「你食乜呀？」 「最平o個個飯係乜？」 「就咁睇，雞扒飯就最平喇，27.5。咦……！但係無o野飲o架喎！」 「咁仲有無得揀呀？」 「見到有北菇蒸雞飯 29 蚊連o野飲！」 「咁都係算喇，雞扒飯飲杯清水算喇。」 我本來睇到個 30 蚊o既焗海鮮飯好似咁錯，起碼唔係我成日食o既六寶飯轉米粉咁悶先。聽完佢地講之後，同埋諗過o下其實個個餐咪又係一樣，所以就跟o左隊，叫o左雞扒飯加雜菇汁。 跟住我就聽到售賣員話一連三個菇汁雞扒。其實一直無留意開，原來我前面個位先生係叫o左北菇蒸雞飯，叫北菇蒸雞飯唔奇怪，奇係奇在原來佢叫一碗一早蒸好o既北菇雞飯加飯，我一直只知碟頭飯先有得添飯，唔知咁樣一碗 preset o既餐都有得加。最後我見餐飲部o既職員要拎多一個碗加多半碗飯俾佢。 前面位先生生活迫人，睇o黎要三餐當一餐；後面兩位先生算無可算，個半都係錢睇o黎真係無辦法，慳得一蚊得一蚊；中間呢位先生唔知幾時先上到車買到樓，真可悲呀。