- Powered by
- WordPress
-
Personal market
呢排個市好似過山車咁千幾點上上落落，少o的心血都嚇死。唔知係未我呢行o既關係，公司同事差唔多個個都會玩股票。可惜o既係我個人真係非常細膽，玩過一次之後就一直都無再入過股市，經常都覺得將o的血汗錢放入去好唔可靠。而因為我讀書o既關係，其實都叫已經學識o左點參與。算喇，都係性格使然，都係睇o下個市，做o下花生友開心o的。 香港人我諗都無乜邊個唔認為入投資銀行係一個幾理想o既職業，天之驕子，收入豐厚。但係我真係無膽之餘亦都無乜野心，總認為人在高處不乘寒。就算好多同事o係公司學滿三年師轉職 ibanker，表面非常風光，都動搖唔到我呢個想法。個人都係想平平穩穩，拾級而上，有穩定o既根基再挑戰極限。但係我當然都有睇下 ibank 行係乜前景，總唔能夠斷自己米飯，但係當次按爆o左，Lehman 兄弟, bear 同埋大摩攪到而家咁，真係撞哂鬼。而家睇新聞真係好似睇戲咁。 今日就睇戲，聽日分分鐘殺到埋身，始終而家o的公司將o的 risk 係咁 diversified，一間謝o左，會連累另一間，一行謝o左，會連累另一行。而家通行都謠傳會 labour cut, 搵人o黎 axed。其實老實講，呢排真係多o左好多人無o野做坐豬肉檯，小弟下個禮拜都係咁。都係醒醒定定，努力工作保住份工之餘，都要比心機進修。多幾張沙紙保住個 market value，真係大吉利是被 axed 都有本事有出路先。 題外話，細妹畢業終於搵到工簽約。入o左物業管理呢行，就住關心o下佢o既關係，都有做o下 research, 了解就業前景。發覺又真係唔錯，由較低級o既屋宛管理，到商場管理，再到地區性物業管理發展，遲o下大陸發展成熟，仲可以殺出去。條路真係可以行到好遠o下，仲幾專業添，有得發展！
-
First trip with Waiting
終於係東京返黎喇！之後一直都因為好多原因兩個人去唔成旅行，今次總算同 Waiting 去第一次o既旅行。哈哈，玩得真係好開心之餘亦都 relax 哂。 呢個團其實係一個刻苦團o黎，唔單止係鴨仔咁簡單。理由係個團要零晨去，晚機返，係真真正正o既早機晚返。 Harsh 到你估唔到，不過呢個團係我揀o既，要 waiting 陪我捱！ haha~ 但係老實講，試過一次之後，對東瀛遊印象非常差，我諗都唔會有第二次再 join 佢團。由報名，導遊、團員、用餐我覺得都唔合格。下次有機會，我一定會俾多少少錢要求一個服務好o的o既。 不過今次旅程係我第一次試露天溫泉、去澡堂集體沖涼，同埋去東京迪士尼。一定要提o下呢個 Disneyland, 同香港o個個真係無得比，之但係人地成廿五年緊係唔同o的喇。俾o的時間香港 Disney 慢慢就會好。 又問waiting o的親戚借o左兩支鏡頭去旅行，用過貴鏡先知道原來咁正。不過阿媽同 waiting 都指點過我，要提醒自己要買車買樓o架！儲錢呀！ 返到o黎就要開始溫書，唔好玩創哂個心先得。加油奮鬥。
-
Friends
我地BU草猛之中終於有人certified 左，諗住出黎大家開心聚舊，點知聽到佢話聽日就上大陸兩個月，做得呢行…我地真係無朋友。 朋友，似乎只可以係 travian 同埋 facebook 裡面先維繫到。 究竟我地除左工作同休息之外仲可以有幾多時間俾到屋企人、女朋友同埋朋友？納悶…
-
My driving exam
陳Sir係一個嚴師，佢要求好嚴格！呢張相個 Post 係駕駛學院指定o既… 學車學到俾個師父勁鬧鬧到就o黎喊o既，我諗係第一個喇。 次次約親學車見面都話我反應咁慢，「而家係駕駛唔係讀書，諗諗諗！諗咁多你都撞o左埋去喇！」唉……我都唔想架，咁我成日都唔夠訓，訓得四五個鐘就要我反應敏捷，咁有困難嘛。但係佢講過o既o野我真係會成日記住，我要注意唔可以俾人覺得我反應慢。 因為咁灰o左成日，就o係 facebook 寫：「 I am now very very 灰」，點知俾 Kevin and Eric 以為佢地迫我做o野，迫到我要上網寫「做到灰」。其實關咩事，一早入得呢行就預左o的o野永遠做唔哂，咁樣樣緊有 trade off o架喇。我反而覺得自己好適合做 audit… 成個性格好似為o左 audit 而成長咁！ haha~ 但係心情真係差透，真係咩自信心都俾阿 sir 鬧到無哂，心諗無理由自己俾咁多錢出o黎仲要自己難受o架，諗o野開始負面，亦都對呢次考試無咩信心……不過我既然已經出o左力，我一定會好好地盡埋力佢o既，之後會好努力咁上堂同練習。期間經過無數次o既爭掙同埋教訓，學o野真係唔可以偷懶o既，而且付出o既唔只係汗水同埋時間。 考試當天我準備好一切，精神飽滿，容光煥發，最後練習多數小時，到最後一刻見運輸處個職員姐姐：「無問題呀，全部都 pass ，過去隔離辦埋o的手續喇。」果一刻真係鬆哂。
-
KPMG Annual Dinner 2008
之前一直都好努力做o野，諗住今日可以做多半日o野之後就 hea 埋個下午再去 annual dinner。呢個 annual dinner 我諗都算係咁多個裡面最頹廢之一喇，個個人都 causal wear ，只係請左個張智林黎唱祝君好。o的禮物先差勁，最貴o既只係 philips 42 寸電視機，好似人地春茗咁，其實每個 partner 俾少少出o黎都夾到大大份禮物喇。 不過我都唔幸呢d野既，志在感受下個氣氛，感覺到個個好似大細路咁，haha~ Koachim 皮褸型呀， Kj 好多女 fans 影相， haha~ 有香檳飲，有甜品食，仲想點？俾 Alan 話我點解唔出大機？ haha ，現場咁黑，我又無閃光燈，影出黎都唔夠 Canon S80 DC 仔靚喇~ 最後等左成幾個字車成兩三點先可以番到屋企… 好喇，正式踏入 study leave 要開始努力溫書喇！
-
Nightmare…
都辭o左職成半年喇，尋晚訓覺居然仲夢見舊公司個 manager ，係夢中一開始就俾佢鬧我做人唔可以咁樣架，你唔可以咁樣對公司架喎。【我講o左個大話而辭職，我講大話就會內咎。】你幾時返o黎幫我手？我而家手上面仲有幾個 jobs ，你返o黎幫我跟一兩個喇！ 同樣o既 situations o係我之前返工遇到個無數次，有o的似 command 咁o既要求幫忙模式，我真係一o的計都無，讓步o左一次又一次。我o係夢中終於有勇氣咁講：「唔好意思呀…我返緊新工喇。幫唔到你手！」 隨即個夢就完o左，不過點解我仲會夢到佢，一切都似o黎得自然而真實，唔通佢之前對我o既欺壓太大？好得人驚，快快快快從我腦中消失。 好似 CK 本書咁話，之前做過一兩次工o既話，就會同之前間公司比較。我比較之下，真係無論而家幾辛苦，我都覺好 enjoyable 同埋 comfortable 囉…
-
New weapon today!
我尋日做o左件好肉赤o既事，突然間覺得自己好有錢，去買o左部單鏡o黎玩。俾個 sales 又話加呢樣，又話加果樣。攪到頭都大埋。 But, anyway, 而家總算拎o左部相機番屋企。 夜晚拎住部機，係又影唔係又影，覺得自己真係攝影師上身咁。要有o的攝影o既觸角。haha~ 影完o的相出o黎一睇，真係好似其他人咁講…「嘩…」o左一聲，眼都大埋。呢部機影相真係好鬼過癮，唔知乜事影o下影o下咁就影五百幾張喇。睇住o的成果，忽然間又覺得，肉赤得o黎又幾值得。而且覺得自己好鬼型添！ wahahaha~ 我要搵下 lovely waiting 做o下 model 先，部機幾靚都係假，最緊要影得佢靚。
-
Professional brothers
Cab-driver told: If at 3 a.m. someone calls a taxi, and NOBODY is DRUNK at the moment – it clearly means that they are accountants/auditors. 的士司機話：如果有人半夜三點鐘叫左架的士，而當時無人飲醉，唔駛解釋，佢地好明顯係會計師/審計師。 Archhhhh.呢句野未必可以成立，因為我以前做野間公司唔太容許我坐的士番屋企。因為o的客仔負擔唔起，又或者我地會圍唔到皮…不過而家可以話係好處(壞處)既係，我而家有呢個"待遇"。工作左半年，已經試過坐的士番屋企五六次，每一次車錢都要成三百蚊。但係對而家o的客仔o黎講，呢o的真係細數目。 其實真係無錯，呢個時間無飲醉而要返屋企o既，我相信九成九係行家……
-
Half year at KP
唔經唔覺已經係新公司做o左半年o野喇，呢半年其實真係過得好充實，算係領教到大 firm 做 audit o既 audit approach 跟 procedures 係點。係之前間公司，待o左半年多o的就感到好似無咩可以再學咁；而家留係度，又覺得o的o野學極都學唔完。一日廿四個鐘係呢度係唔夠用o既…只係覺得o的同事個個都身懷絕技，唔係有o的記憶力超勁，就係兩文三語超哂班，又或者係讀書研究型o既學者咁，仲有o的做o野非常醒目，problem solving skills 超勁咁。週圍都臥虎藏龍，要每一個人都拜師學藝，或者偷學一招半識，睇o黎都唔係一段短時間做到o既o野，我諗我仲有好一排要係呢個少林寺度鍛鍊。可能我真係會留係度 「三年 for 考牌、十年做 partner 」都未定。Anyway, 而家我又做得滿意，同事對我又非常好，又感到o的 managers 對我感覺唔錯，自己受到重視，而待遇又唔錯。除o左辛苦之外，我都未搵到o野挑剔。 早一排用 *.jpg o黎 search 公司其中一個 server o黎消磨時間【因為剛交完功課，等緊老闆 feedback】，俾我搵到大老闆 Carlson Tong 個background 同埋佢屋企係邊，haha~ 而家五十幾歲，廿幾年前畢業就加入o左 KPMG London，做o左幾年就 second 番o黎 Hong Kong ，只係用o左十年時間就做o左 partner ，之後平步青雲做過會計師公會副主席、證卷交易所 director 、而家係 KPMG China and HK o既 Chairman 同埋大有錢佬一個…點樣有錢法？因為我知到佢住係 Pokfulam Villa…
-
Reading is essential to life.
最近睇左好多文章同書咁，透過呢o的去思考更多日常忽略o左o既事情。有時真係唔想成日諗住點樣去搵多錢買樓買車、買股票、分析市場咁【雖然我日日都有咁做，好想盡快達到自己既目標】，成個人銅臭化哂之餘，仲攪到自己好急進。日頭返工已經成日望住o的 dollar sign ，無理由自己得閒休息o既時候都俾咁大壓力自己諗計去增加財富o架嘛。 睇左三o野好想係度分享下咁。 有留意開呢度o既話會見到右下角有個連結連去張五常個 blog 度，我每隔一排就會去掃佢一堆文章。呢個人睇佢o的文就知佢好鬼自大，或者話非常有自信。但係咁樣反而有種吸引力，愈睇愈想知佢究竟係咩o野去支持到佢呢份自信，我o既問題未答到，反而慢慢佩服o左佢。佢沉醉於佢o既經濟領域裡面，自成一格。覺得佢好鬼型~ haha~ 就諗諗自己，係未可以自己都創造一個領域，型一型呢？如果真係咁，選擇呢個會計 profession 度做型人…？ 都係比心機考埋個牌先把喇。 睇最新一期 HKICPA o個本 A-Plus, 睇 cover 見到 Susanna Li 呢個名。腦海中即刻浮現o左某一日 Susanna 打個電話o黎問候我，話佢而家o岩o岩o係浸大上完堂，記得我浸大畢業咁。諗到咁上下，就即刻揭去 index page ，見到 Susanna 張相，再揭內頁。標題話佢終於合格做到專業會計師。o個一刻相當感動之餘仲非常之振奮，是關佢可以話係我第一個 audit o既師傅。我 Year 2 時經 YMCA interview 去左 Chan & Wat 度做 audit internship ，足足跟住佢學o野學o左三個幾月。感動係因為我 last day 佢用佢既經驗講左個故仔黎鼓勵我，我而家諗番佢對我o既影響真係好大。振奮係因為我又見到一個活生生出人頭地o既例子，我‧都可以。 further: http://www.hkicpa.org.hk/APLUS.php pre.: https://tigerlazy.net/blog/2005/08/13/灰？no grey again/…
