今日一路準備工作既時候順便偷閒去更新一下o的bookmark。發覺已經一年多無黎呢個個人網站。無錯，個人網站呢個都幾old school 既term我諗現時好多人都未必經歷過。我留意到大家都話社交網站受到監控，而一o的出名既網上社交人士呼籲讀者轉去另外一o的社交網站，令我不其然諗番起成立個人網站呢樣野同埋當時建立個人網站既熱潮。
今年為左抗疫，在家中添置了幾樣抗疫神器。少不免有switch 、動森、ring fit、Just Dance、麵包工房等等，幫太太解決左佢宅在家既無聊。尋日仲加入左 netflix呢個新成員，馬上睇左兩集劇集，其中一集係遠古BBC 既 Sherlock Holmes第一輯第一集，John Watson 見醫生，醫生同佢講將心事寫落個blog度作為治療。可能係咁，今日有個潛意識要黎呢度懷緬過去舊事。
第一個難關係要突破自己既記憶枷鎖，點樣可以諗番個密碼入黎編輯版面，經過一輪努力同埋自豪既密碼管理方法使用之後，終於成功過關入黎呢度寫下最近的瑣碎事，第二個難關更複雜，就係要解決大量執筆忘字既問題，呢度話俾之後既自己知，以上既每句句子最少有兩三個字完全唔記得點寫。仲有第三個難關就係，我呢一刻明白有需要維持寫下blog，但我有幾大決心同毅力寫落去？
維持寫blog既好處：
- 舒發感受同壓力
- 練習寫作，防止執筆忘字
- 訓練同整理思維，腦袋不能只有input無output。有output, o的知識先至係屬於自己
- 每日覆盤，可以令自己每日有進步
寫blog既難處：
- 每日工作挑戰忙到無得休息，可以點安排時間寫野？
- 做左人夫之後，點樣安排到慎獨既時間，平衡各個身份之下既責任？
- 寫blog仲有乜野話題？
- 公開blog既內容會唔會影響自己既工作、前途、理念同埋一o的無辦法預料到既後果？
初步解決方法既建議：
- 安排一個私人時間處理blog務，好似今日咁呢個lunch time?
- 寫blog既初心只求寫下自己野，無謂諗得咁辛苦遷就讀者意見？
- 寫都係寫o的我個人關心既事項，例如，家庭、工作所見所聞事項、個人心智發展、健康？但作為一個有political apathy既人仲係未真係可以生存到？想做一個生存係平行時空既人仲係未一個正常人？本身就唔想討論政治既人係唔會識答呢o的問題，因為呢o的本身就係政治問題。
- 就算唔理政治，但係政治會黎搵我，我有無心理準備應付突如其來既危機？呢個問題我無解決辦法，暫時hold on。
最近生活同工作既體驗：
- 如果唔用evernote，轉用notion有乜好處？其實點解坊間有人突然間話唔用evernote？
- 就黎要參與主持公會既活動，好快黎緊就係工作生涯上既一個milestone
- 阿妹就黎有新成員、阿媽同阿妹又就黎搬屋，作為阿哥同仔我有乜野要預備同埋處理？
- 2020呢個咁既環境好似無野achieve到，黎緊2021仲有乜野可以set personal and work goals？Goal-setting 係今年黎講比起以前更加困難，點樣先可以拎到最大既社會資源？
Leave a Reply